BLOGGER TEMPLATES - TWITTER BACKGROUNDS ?

الجمعة، 28 نوفمبر 2008

الأستاذ فقران " الحلقة رقم (1)

في أحد الأزمان .. كان فيه انسان فقران .. حالة ديما عدمان ..جيبه ديما مليان .. بقروش ايام زمان

فقران راجل متعلم .. كان على طول يتألم .. كل لما يفوت و يسلم .. على صحبه اللي بقى معلم
و تعوده الذكريات .. لما كان بالساعات .. يقعد يسمع حكايات .. في حصص و محاضرات ..و أخرها بقى شحات

يرجع و يعد في ماله .. و يقول أنا مالي و ماله .. حالي بقى غير حاله ....
و يقول أنا شأني عظيم .. طالب جامعي قديم .. و معايا كمان دبلومة و موظف في الحكومة
لكن هو معهوش .. غير دبلوم مغشوش .. و أهو شغال جزار .. و في دم ليل و نهار

يرجع يفتكر حاله .. و يعد تاني في ماله .. و يقول في عقل باله...
هل هقدر أقرر .. أقلل من السكر .. علشان سعره اتغير .. و اتضاعف و اتكرر
و بدأ يقنع نفسه بضرورة التغيير .. معلقة سكر في الشاي ؟ .. لأ لأ برضه كتير .. هحط على الكوباية نص معلقة كفاية
و أكيد أنا جالي السكر .. فلازم أخفف أكتر .. خلاص قررت ألغيه و أعفي نفسي و أعفيه .. مش حاطت سكر خالص .. و الشاي كمان بناقص
و يشوف و هو ماشي .. ناس قعده على كراسي .. واحد بيقول للتاني .. العيد أهو جاي من تاني .. فاضله بس يومين .. هنجبله فلوس ده منين
يرجع و يكلم نفسه .. يندب حظه لأ نحسه ..

و العيد أهو قرب ييجي و منين اللحمة هتيجي .. لأ لأ بلاش اللحمة .. دي حتة بتعمل تخمة .. أنا حتة واكلها قريب .. الراجل جارنا ده طيب .. كان دابح عجل سمين .. من شهر او شهرين .. و بعتلي نص كيلو .. كان لحمه هو قليله

أه أنا إفتكرت .. خلاص خلاص قررت .. هاكل لحمه في العيد .. دى هيبقى عيد سعيد .. أصله عيد الأضحى .. و فيه بدري راح أصحى .. و أكيد الحاج معروف .. هيضحي السنة دي بخروف .. هيجبلي نص كيلو .. معاه او مع غيره .. هعمله أصناف كتيرة على أيام قليلة .. هعمل حتة كباب و راح اشيلها في الدولاب .. و حته تبقى كفتة و أعمل حتة على فتة ..

يا سلام على الأعياد .. دي كلها اسعاد .. ياريت كل الأيام تبقى أعياد في أعياد