بعد ما خلص العيد .. فقران مبقاش سعيد .... أصل اللحمة خلصت .. و فلوسه كمان أهي نقصت .... هيكمل شهره إزاي .. و هيخصم إيه مع الشاي
أعد يفكر تاني .. رجعت تاني أحزاني .... خلصت اللحمة خلاص .. كانت حلوة بإخلاص .... هألغي إيه المرة دي .. دا بقى شيء مش عادي
أنا بفطر كل يوم .. أول ما أصحى من النوم .... يسلام على التبذير .. د أنا لازم أخس كتير .... بلاش فطار خالص .. و كمان العشه بناقص .... خليني أعمل رجيم .. علشان أبقى سليم .... أصلي تخنت شوية .. من اللحمة المشوية
مشي فقران على الرجيم .. مع إنه كان أليم .... لكن صمم عليه .. ما هو ما في شيء بإديه
و في يوم و هو ماشي سمع بيان حكومي .. إدبحوا كل الفراخ و كمان معاها الرومي ....فكر فقران و قال :
ندبح الرومي ليه؟! و فراخي ذنبها إيه .... قصدي يعني الكتكوت .. أنا حته بحبه موت .... لكن ندبحهم ليه .. هم كانوا عملوا إيه؟! حاولوا يغتالوا الريس .. و للا حاقدين عليه ؟! .... يمكن تنظيم إرهابي .. طبعاً دول مش أحبابي .... راح أدبح الكتكوت .. أن شا الله حتى يموت .... مع إني كنت بربيه .. و بعلم فيه و مهنيه .... علشان أبيعه على العيد .. و أشتري لبس جديد
قابل و هو ماشي صحبه حسن الدكتور .. سلم عليه و سأله ليه ندبح الطيور .. رد عليه الدكتور .. علشان المرض المنشور .. أنفلوانزا الطيور .. دا بقاله يا بني شهور .... فأفتكر في اللحظة دي قصة صحبه منصور .. و حكايته عن الطيور .... إللي في بلاد الصين .. مات منها ييجي ألفين .. و من الناس ييجي متين .. بسبب المرض اللعين
رجع و قال لنفسه ... ده كده فايده ليه .. هاكل فراخ مقلية .. من إيد الست فتحية .... أصل الست فتحية .. متين فرخة مربية .... و أكيد هتدبحهم .. و علينا توزعهم .... يسلام على الحكاية دي .. دا هيبقى شيء مش عادي .... هينوبني أكيد عشرين .. هيكفوني شهرين .... يسلام دا أحلى كلام .. سمعته من أيام .... مشي فقران سعيد .. و كأنه اليوم في عيد
0 التعليقات:
إرسال تعليق